Трамп АҚШ денгиз флотини "Олтин флот"га айлантирмоқчи

АҚШ президенти Дональд Трамп АҚШ денгиз флотини янгилаб, уни "Олтин флот"га айлантирмоқчи.

Бу ҳақда The Wall Street Journal манбаларига таяниб хабар бермоқда.

Манбаларга кўра, Оқ уй ва Ҳарбий-денгиз кучлари расмийлари мавжуд флотни Хитойга ва эҳтимолий таҳдидларга қарши туришга қодирроқ бўлган янгисига алмаштириш имкониятини муҳокама қилмоқда. Нашрнинг қайд этишича, муҳокамалар дастлабки босқичда ва Трамп иштирок этмоқда.

Ҳозирда АҚШ ҳарбий-денгиз кучлари асосан эсминецлар, крейсерлар, авиаташувчилар, сув ости кемалари ва амфибия кемаларидан иборат, дея қайд этади газета. "Олтин флот"га узоқ масофали ракеталар билан қуролланган йирик ҳарбий кемалар кириши кутилмоқда. Бундан ташқари, Оқ уй ва Пентагон гипертовушли ракеталарни ташишга қодир янги, оғир зирҳли кема яратиш бўйича мунозараларни бошлади.

Вашингтон флот 280 дан 300 тагача кемадан, шунингдек, "кўп сонли пилотсиз кемалардан" иборат бўлишини кутмоқда. Нашрда ушбу режани амалга ошириш муддати ёки унинг нархи кўрсатилмаган.