Тошкентда кутилмаган "спектакль": икки аёл бор-будидан айрилди

Инсоннинг энг катта душмани унинг нафсидир. Нафсига қул бўлган одам ишламай пул топиш, осон бойиш йўлларини қидиради. Бу бало қайсар болакайдек ушлаб олган нарсасини хоҳлаб тураверади. Унга эргашган кишининг эса охир-оқибат юзи шувут бўлади, деб ёзади "Postda".

Келинг, сўзимизни бир жиноят иши мисолида давом эттира қолайлик. Баҳор ойлари, кунлар анча исиб қолган. Темурнинг (исмлар ўзгартирилди) уйланганига 6 ой бўлган. Турмуш ташвишида «Нексия» автомобилида киракашлик қилиб юрган вақтлари эди. Кунларнинг бирида кечки соат 21:00 ларда уч нафар аёл уни тўхтатади. Йўлда бир аёл машинадан тушиб қолади. Қолган икки аёл ҳайдовчига Бўстонлиқ туманига ташлаб қўйишини айтади. Ҳайдовчи билдики, улар тоққа дам олгани кетяпти. Йўловчилар ҳайдовчига «Роҳат» бозорига кириб ўтишини илтимос қилишади. Йўл четида тўхтаган машинадан тушган аёллар тезда чиқишини айтиб, кутиб туришини тайинлайди. Улар кетганидан сўнг Темур таниши Акбарни кўриб қолади. Салом-аликдан кейин Темур аёллар тоққа дам олгани кетаётганини айтади. Акбар ундан аёлларнинг қанча пули борлигини сўрайди.

Хуллас, икковлон талончилик қилиш режасини тузишади. Жиноий режага кўра, ҳайдовчи Юқори Чирчиқ туманига етганда катта йўл четида гўёки машинаси бузилиб қолганини баҳона қилиб тўхтаб турса бас, Акбар қолган «иш»ни икки шериги билан дўндирадиган бўлади.

Темур Акбарнинг айтганини қилди. Жиноий шериги билан келишган жойга етганда, машинани йўл четида тўхтатди. Капотни очиб, гўёки нималарнидир текшираётгандек бўлди. Ҳеч нимадан хабари йўқ аёллар ўзаро суҳбатлашиб ўтирарди. Бу орада ёнларига «Спарк» машинаси келиб тўхтади. Ундан нотаниш йигит тушиб, тўғри Темурнинг олдига келди-да, уни «дўппослай кетди». Ҳайдовчи ўзини мазаси қочганга солди. Шундан кейин Акбар тўғри аёлларнинг олдига келди-да, уларга тегишли сумкани олиб қочди.

Аёллар сумкаси ичидан бир дона «Самсунг» русумли уяли телефон, 100 АҚШ доллари ва 600 минг сўм пул чиқди. Орадан бир соатлар ўтиб, Темур «ўлжа»ни бўлишиш учун келишилган манзилга етиб борди. У аёлларнинг мазаси бўлмай қолганини, уйи­га ташлаб келганини айтди. Хуллас, қўйилган «спекталь» қойилмақом чиққанидан унинг оғзи қулоғида эди.

Дарвоқе, Акбар шерикларига сумка ичидан 600 минг сўм пул ва телефон чиққанини айтиб, 100 АҚШ долларини яшириб қолди. Қўлга киритилган пулдан «Спарк» эгаси Алига кира учун 70 минг сўм берди. Темур, Али, Шоди, Акбар тўртовлон қолган
530 минг сўм пулни «Роҳат» бозоридаги емакхонада кайфу сафога сарфлаб юборди.

«Бузоқнинг югургани сомонхонагача», деган нақл бежиз яралмаган. Тўртовлон қўйган «спектакль»нинг тез орада «миси чиқди». Тоғни урса талқон қилгудек бу йигитлар ўз вақтида нафсини жиловлаганда, суднинг қора курсисида бошини эгиб ўтирмаган бўларди.

Ҳусан САРБОЕВ,

Юқори Чирчиқ тумани

ИИБ ҳузуридаги

тергов бўлими катта терговчиси,

капитан.