Тоқаев ОАВни Қозоғистоннинг мафкуравий суверенитетини таъминлашга чақирди

Қозоғистон президенти Қосим-Жомарт Тоқаев Республика оммавий ахборот воситалари ходимларини касбий байрами билан табриклар экан, уларни мамлакатнинг ахборот хавфсизлигини ҳамда мафкуравий суверенитетини таъминлашга чақирди.

"Мамлакатнинг ахборот хавфсизлиги ва мафкуравий суверенитетини таъминлаш учун журналистларимизнинг Қозоғистонда ва дунёда бўлаётган воқеаларга нисбатан ўз нуқтаи-назари бўлиши керак", – дея таъкидлаган Тоқаев ўз табригида.

Президентнинг айтишича, бугунги кунда интернет ишончсиз ахборотлар билан тўлиб кетган. "Бундай мураккаб шароитда айнан сизнинг объектив ва танқидий қарашларингиз ёлғон ва миш-миш хабарларнинг тарқалишига ишончли тўсиқ бўла олади. Шу боис профессионал журналистиканинг аҳамияти ҳар қачонгидан ҳам юқори", – деди у.

Тоқаевнинг таъкидлашича, "барчамизнинг олдимизда янги, адолатли Қозоғистонни қуришдек, муҳим вазифа турибди".