Американинг WeAreTheMighty портали ҳозирги кундаги энг тез ҳаракатланувчи ҳарбий ҳаво кемаларининг бешталигини эълон қилган. Улардан иккитаси АҚШ маҳсулоти бўлса, учтаси собиқ СССРда ишлаб чиқила бошлаган самолётлардир.
Рўйхатнинг етакчиси – учувчисиз Boeing X-37 ҳаво кемаси бўлиб, АҚШ ҳукумати унинг хусусиятларини қаттиқ сир тутиб келади. Маълум қилинишича, у ҳатто товуш тезлигидан ҳам 16 карра тезроқ уча олади!
Иккинчи ўринни собиқ шўро ҳарбийлари ишлаб чиққан МиГ-25 самолёти банд этган. Унинг учиш тезлиги соатига 3916,8 километрга етади.
Учинчи поғонани эгаллаган АҚШ қирувчи-бомбардири F-15E Strike Eagle ҳам анча эски модел – уни 1986 йили ишлаб чиқишган. Мазкур самолёт 3060 км/соат тезликда ҳаракатлана олади.
Рейтингдаги тўртинчи қатордан яна ўша СССРнинг қирувчи-тутувчи МиГ-31 ҳарбий самолёти жой олган. Нисбатан кичикроқ баландликдаги парвозида у 1500 км/соат, юқори баландликда эса 3400 км/соатлик тезликка эриша олади.
Охирги ўринни эса оғир қирувчи – Су-27 самолёти эгаллаган. 11 километрлик баландликда унинг тезлиги 2500 км/соатга етади.