Тимур Турлов FIDE президенти этиб сайланди

Freedom Holding асосчиси ва бош директори, Қозоғистон Шахмат федерацияси раҳбари Тимур Турлов Халқаро шахмат федерацияси (FIDE) президенти этиб сайланди. Сайлов 26 сентябрь куни Самарқандда бўлиб ўтган FIDE Бош ассамблеясида ўтказилди.

Президентлик учун уч нафар номзод — Турлов, немис тадбиркорлари Ян-Хенрик Бюттнер ва Вадим Розенштейн курашди. Биринчи турда Турлов 96, Розенштейн 76, Бюттнер эса 20 овоз олди. Ҳеч бир номзод зарур кўпчилик овозини тўплай олмагани учун иккинчи тур ўтказилди.

Иккинчи турда Турлов 110 овоз билан ғалаба қозонди. Розенштейн 85 овоз олди.

Шахмат бўйича 15-жаҳон чемпиони Вишванатан Ананд Турлов билан биргаликдаги сайлов рўйхати таркибида FIDE президенти ўринбосари этиб сайланди.

38 ёшли Турлов FIDE тарихида сайланган энг ёш президент бўлди. У Москвада туғилган, 2022 йилда Россия фуқаролигидан воз кечиб, Қозоғистон фуқаролигини олган.

2018 йилдан бери FIDE президенти лавозимини Аркадий Дворкович эгаллаб келаётган эди. У 2026 йил июль ойида Европа Иттифоқининг санкциялар рўйхатига киритилганидан сўнг президентлик вазифасини вақтинча тўхтатган ва янги сайловларда иштирок этмасликка қарор қилган.