The New York Times Трампнинг учинчи президентлик муддати юзасидан берган баёнотлари ҳақида турли тахминларни илгари сурди

Нашр Доналд Трамп нима учун суҳбатларда АҚШ Конституциясига зид равишда учинчи президентлик муддати эҳтимолини инкор этмаётгани ҳақида турли версияларни келтирди.

"Трампнинг бундай гап-сўзлари одамларни ноқулай ҳолатга солади. Сўл қарашдаги одамларнинг жаҳли чиқади. Шунингдек, бу бошқаларда Трамп кутилганидан ҳам узоқроқ вақт ҳокимиятда қолиши ҳақидаги фикрни юзага келтиради. Трамп одамларни ноқулай ҳис қилдиришда жуда муваффақиятли", — дея изоҳ берди республикачилар стратеги Дейв Карни.

Республикачилар партиясининг етакчи вакиллари Трампнинг 2028 йилда қайта сайланиши эҳтимолини рад этишди. Сенатдаги кўпчилик етакчиси Жон Тьюн Трамп "шунчаки бундан завқланмоқда" деб ҳисоблайди. Вакиллар палатасидаги кўпчилик етакчиси Стив Скализ эса, президент жамиятда баҳс-мунозара уйғотишга ҳаракат қилаётганини айтди.