Tesla Хитойда сунъий интеллектга асосланган овозли ёрдамчисини рўйхатдан ўтказди

Шанхай расмийлари Илон Маскнинг Tesla компанияси генератив сунъий интеллект модели асосида ишловчи овозли ёрдамчи функциясини Хитой Кибермакон бошқармасида муваффақиятли рўйхатдан ўтказганини маълум қилди. Ушбу функция Шанхайда давлат назоратидан ўтган 158 та сунъий интеллект иловалари рўйхатига киритилди.

Tesla мамлакатдаги маҳаллий рақобатчилари билан курашиш учун бу қадамни ташлади. Хитой компаниялари аллақачон ўз машиналарига турли сунъий интеллект тизимларини интеграция қилиб бўлган.

Аввалроқ, Tesla Хитой бозоридаги устунлигини тиклаш учун DeepSeek ва ByteDance компаниясининг Doubao AI тизимларини ўз моделларига жорий этишни режалаштираётгани ҳақида хабарлар берилган эди. Бу компания автомобилларини маҳаллий истеъмолчилар учун янада жозибадор қилишга қаратилган.