Суриядаги тўқнашувда тўрт киши ҳалок бўлди

Сурия демократик кучлари (СДК) Алепподаги Сурия армияси позицияларига учувчисиз учоқлардан зарбалар берди.

Бу ҳақда SANA ахборот агентлиги хабар берди.

Хабарда айтилишича, зарбалар Шайх Мақсуд ва Ашрафий туманларидаги турар-жой ҳудудларига қаратилган. СДК ҳужумидан кейин расмийлар Алеппо-Газиантеп йўлини ёпишга қарор қилди. Сурия ҳарбийлари бунга жавобан дрон ва ракета учирувчи қурилмаларга зарба берди.

Бундан ташқари, СДКнинг ўққа тутилиши натижасида бир аскар ва учта тинч аҳоли, жумладан, қишлоқ хўжалиги бошқармасининг икки ходими ҳалок бўлди, яна 15 га яқин киши, жумладан, икки бола яраланди.

Алеппо губернатори Аззам ал-Ғариб Х ижтимоий тармоқ платформасида тегишли идора ва кучлар ёнғин манбаларини бартараф этиш, вазиятни назорат қилиш ва жамоат хавфсизлигини таъминлаш бўйича қатъий чоралар кўраётганини маълум қилди.