Россиянинг беш вилоятида мигрантлар учун мослашиш марказлари очилади

Россиянинг беш вилоятида мигрантлар учун мамлакатдаги ҳаёт ва меҳнат қоидалари бўйича бепул маъруза курсларига эга мослашиш марказлари очилади.

Марказлар Кемерово вилояти, Хабаровск ўлкаси, Якутия, Челябинск вилояти ва Татаристонда пайдо бўлади. Курсларга ихтиёрий равишда қатнашиш мумкин.

Дастур миграция ва меҳнат қонунчилиги, жавобгарлик, жамиятдаги хатти-ҳаракатлар нормалари, Россиянинг Марказий Осиё билан муносабатлари тарихи, шунингдек, экстремизм ва терроризмнинг олдини олиш масалаларини ўз ичига олади.

Курс давомийлиги бир соатдан бир неча соатгача, 20-30 дақиқалик блокларга бўлинган.

Материаллар етакчи университетлар ва ихтисослаштирилган идоралар - Ички ишлар вазирлиги, Меҳнат вазирлиги, Ташқи ишлар вазирлиги, Россотрудничество ва бошқалар иштирокида ишлаб чиқилган.

Ташкилотчиларнинг қайд этишича , курсларнинг мақсади мигрантларнинг расмий тузилмаларга ишончини оширишдир.