Россияда ёқилғи тақчиллиги яна кучаймоқда

Июль ойининг иккинчи ярмида бироз юмшаган Россиядаги бензин тақчиллиги яна кучайди. Қатор ҳудудларда АЁҚШларда ёқилғи тугаб, сотувга чекловлар киритилмоқда ва навбатлар юзага келмоқда.

Автомобилистларнинг ёқилғи қуйиш шохобчаларидаги вазият ҳақидаги хабарларини жамлайдиган GdeBENZ платформаси маълумотларига кўра, 16 август ҳолатида фойдаланувчилар бензин ёки дизель ёқилғиси мавжудлигини билдирган АЁҚШлар улуши 28,1 фоизга тушган. 9 августда бу кўрсаткич 41 фоизни ташкил этган эди.

Энг сезиларли муаммолар Россиянинг жануби, Волгабўйи ва айрим марказий ҳудудларида кузатилмоқда. Россия ҳукумати ҳам қатор субъектларда ёқилғи етказиб беришда узилишлар сақланиб қолаётганини тан олмоқда.

Оренбург вилоятида 12 августдан яна чекловлар жорий этилди: автомобиллар давлат рақамининг охирги рақамига қараб белгиланган кунларда ёқилғи қуйиши мумкин. Липецк вилоятининг айрим АЁҚШларида ҳам шунга ўхшаш тизим қайта жорий этилди. Бу ерда бир автомобиль учун бензин сотиб олиш 30 литр билан чекланган.

Краснодар ўлкасида ҳам вазият мураккаблигича қолмоқда. 17 август куни Анапа шаҳрида ишлаётган 25 та АЁҚШдан 11 тасида ёқилғи фақат ёқилғи картасига эга автомобиллар ва махсус хизмат машиналарига сотилган. Қолган шохобчаларда ҳам турли чекловлар амал қилган.

17 август куни эрталаб Новороссийскда ишлаётган 28 та АЁҚШдан фақат бештасида АИ-92 бензини, олтитасида эса АИ-95 бензини мавжуд бўлган. Дизель ёқилғиси 27 та шохобчада сотилган.

Севастополда ёқилғини QR-кодлар орқали сотиш тизими яна жорий қилинди, асосий бензин турларини сотиш эса бир автомобиль учун 20 литр билан чекланган. Олтой Республикасида эса бир автомобилни суткасига бир мартадан ортиқ ёқилғи билан тўлдиришга рухсат берилмаяпти.

Москвадан ҳам айрим ёқилғи турлари танқислиги ва навбатлар ҳақида хабарлар келмоқда.

Тақчиллик фонида Федерал антимонополия хизмати ёқилғи бозоридаги текширувларни кучайтирди. Йил бошидан 17 августга қадар идора нефть компаниялари ва мустақил бозор иштирокчиларига нисбатан 41 та иш қўзғатиб, 68 та огоҳлантириш берган. Шундан 30 та иш ёз ойларида қўзғатилган.

Россия ҳукумати муаммолар сабаблари қаторида нефтьни қайта ишлаш қувватларининг бир қисми тўхтаб қолиши, Украина дронларининг энергетика инфратузилмасига ҳужумлари, мавсумий талабнинг ошиши ва ҳудудларга ёқилғи етказиб беришдаги логистика муаммоларини келтирмоқда.

Ички бозорда таклифни ошириш мақсадида Россия бензин импортини анъанавий етказиб берувчилар — Беларусь ва Қозоғистондан ташқари, Ҳиндистон ва Марокашдан ҳам кўпайтирди.

Ҳукумат бензин экспортига вақтинчалик тақиқни 2027 йил 31 январга қадар узайтирди ва нефть компанияларига ёқилғи танқислиги кузатилаётган ҳудудларга етказиб беришни кўпайтиришни топширди.

Бундан ташқари, ҳукумат бензиннинг Евро-2, Евро-3 ва Евро-4 экологик синфларини ишлаб чиқариш, импорт қилиш ва сотишга вақтинча рухсат берди. Бу ёқилғи турларига Евро-5 стандартига нисбатан юмшоқроқ экологик талаблар қўлланади.