Россияда «Сен ёлғиз эмассан» марафонининг сайти блокланди

Мустақил ОАВ «ФБК» билан сиёсий маҳбусларни қўллаб-қувватлаш мақсадида ўтказган марафоннинг june12.io сайти энди Россияда ишламаяпти. Ташкилотчилар кейинги мулоқотни электрон почта орқали амалга оширишни сўраяпти.

Россияда 12 июн куни мустақил ОАВ Коррупцияга қарши кураш фонди («ФБК») билан ҳамкорликда сиёсий маҳбусларни қўллаб-қувватлаш мақсадида ўтказган «Сен ёлғиз эмассан» марафонининг сайти блокланди. «Медуза» 14 июн, жума куни ўз текширувига асосланиб, june12.io. сайти Россияда энди ишламаётганини тасдиқлади.

Нашр ўз веб-сайтида россиялик сиёсий маҳбусларга қўшимча ёрдам кўрсатишни таклиф қилди, бундай қўллаб-қувватлаш усулларини тушунтирди ва алоқа учун ариза шакли, алоқа ва электрон почта манзилини кўрсатди. «Ёрдам марафон тугаганидан кейин ҳам қабул қилинмоқда», - дейилади марафон ташкилотчиларидан бири бўлган «Медуза» хабарида.

Мустақил ОАВ ва «ФБК» 12 июн куни «Сен ёлғиз эмассан» марафонини ўтказди

Россия мустақил матбуоти «ФБК» билан биргаликда 12 июн куни сиёсий маҳбусларни қўллаб-қувватлаш мақсадида «Сен ёлғиз эмассан» деб номланган марафон ўтказди. Акция ташкилотчилари орасида «Медиазона», «Медуза», «Дождь», шунингдек, «ФБК»нинг «Популярная политика» ва «Навальный Live» лойиҳалари бор. Қутб доираси ортидаги колонияда вафот этган россиялик мухолиф сиёсатчи Алексей Навалнийнинг беваси Юлия Навалная акцияда иштирок этишга чақирди.

Россиялик сиёсий маҳбусларни қўллаб-қувватлаш марафони иккинчи марта ўтказилмоқда. 2023 йилда кампания давомида 40 миллион рублга яқин пул йиғишга муваффақ бўлинди, дея хабар беради Навалний жамоаси. Ушбу маблағларнинг катта қисми маҳбуслар, уларнинг қариндошлари ва репрессиядан қочганларга ўтказилди. Хайриялар ёрдамида жарималар ва адвокатларнинг иш ҳақи ҳам тўланган. Бундан ташқари, пулнинг бир қисми сиёсий маҳбусларни қўллаб-қувватловчи ташкилотларга ўтказилди.