Россия Ташқи разведкаси Сербияни Украинага ўқ-дорилар етказиб беришда айблади

Россия Ташқи разведка хизмати “Сербия ҳарбий саноати Россияга орқадан зарба бермоқчи” сарлавҳаси остида пресс-релиз эълон қилди.

Эълон қилинган баёнотга кўра, бу етказиб беришлар “сохта сертификатлар ва воситачи давлатлар” кўринишида, NATO'га аъзо мамлакатлар, жумладан Чехия, Полша ва Болгария ёрдамида амалга оширилмоқда.

Сербия президенти Александр Вучич агар серб ўқ-дорилари Украинага юборилиши эҳтимоли бўлса, бу каби битимларни тўсиб қўйишини айтди.

Вучичнинг сўзларига кўра, якуний фойдаланувчиси номаълум бўлган барча шартномалар текширувдан ўтказилади, бу борада россиялик ҳамкорлар билан бирга ишчи гуруҳ тузилган. У шубҳали келишувлар бекор қилинишини билдирди. Шу билан бирга, Вучич Сербия ҳарбий-саноат комплексида 25 минг киши ишлаётганини ва бу заводлар фаолият юритиши кераклигини таъкидлди.

"Агар Африкага, Европа Иттифоқига ва Қўшма Штатларга қурол сота олмасак, уни қаерга экспорт қиламиз? Биз Сербия манфаатлари учун ишлаяпмиз", — деди президент.

Шу билан бирга, Сербия раҳбари бу масалани аввалроқ Россия президенти Владимир Путин билан бўлиб ўтган учрашувда муҳокама қилганини ҳам айтди, бироқ унинг тафсилотларини ошкор этмаслигини билдирди.

Ўтган йил июн ойида Financial Times Сербиядан учинчи томонлар орқали Украинага етиб борган ўқ-дорилар экспорти ҳажми тахминан 800 миллион еврони ташкил қилганини ёзган эди.