Рафинья "Олтин тўп" рўйхатидан жой олмаганига муносабат билдирди

"Барселона" ҳужумчиси Рафинья 2026 йилги "Олтин тўп" учун номзодлар орасида ўзи ва жамоадоши Педрининг йўқлигига муносабат билдирди.

Бразилиялик футболчи бу қарорни адолатли деб ҳисобламаслигини айтди. Унинг фикрича, Педри ҳам соврин учун даъвогарлар қаторида бўлишига муносиб эди.

"Мен буни адолатли деб ўйламайман. Гап фақат мен ҳақимда эмас, Педри ҳақида ҳам кетмоқда. Менимча, у ҳам номзодлар рўйхатида бўлиши керак эди", — деди Рафинья RAC1 нашрига берган интервьюсида.

Ўтган мавсумда Рафинья барча турнирлар доирасида 33 та учрашувда қатнашиб, 21 та гол урди ва 8 та голли узатмани амалга оширди.

Шунингдек, у "Барселона" билан Испания чемпионлиги ва мамлакат Суперкубогини қўлга киритди.

2026 йилги жаҳон чемпионатида эса Рафинья иштирок этган Бразилия терма жамоаси 1/8 финал босқичида мусобақани тарк этган эди.