Қозоғистонда АЭС қуриш бўйича референдумга овоз бериш якунланди

Қозоғистонда атом электр станцияси (АЭС) қуриш имконияти бўйича республика референдумида овоз бериш якунланди.

Референдумда битта савол бор эди: "Сиз Қозоғистонда атом электр станцияси қурилишига розимисиз?” Овоз бериш иштирокчилари иккита жавоб вариантидан бирини танлашлари керак эди: “ҳа, розиман” ёки “йўқ, рози эмасман”. Сайлов рўйхатига 12,2 миллиондан ортиқ қозоғистонлик киритилган. Референдум ўтган деб топилди, чунки унда овоз бериш ҳуқуқига эга бўлган фуқароларнинг 50 фоиздан ортиғи иштирок этди. Референдум бўйича Марказий комиссия эълон қилган сўнгги маълумотларга кўра, маҳаллий вақт билан соат 18:00 ҳолатига кўра сайловчиларнинг 61,56 фоизи иштирок этган, 7,5 миллионга яқин киши овоз берган.

Референдумга қўйилган масала юзасидан қарор қабул қилиш учун уни овоз берган фуқароларнинг ярмидан кўпи қўллаб-қувватлаши керак. Марказий комиссиянинг референдум якунлари тўғрисидаги хабари овоз беришдан кейин етти кун ичида эълон қилиниши керак.