Қозоғистон президенти Танзила Норбоевани мукофотлади

Қозоғистон президенти Қосим-Жомарт Тўқаев Ўзбекистон Олий Мажлиси Сенати раиси Танзила Норбоевага II даражали «Достық» («Дўстлик») орденини топширди. Бу ҳақда Акорда матбуот хизмати хабар берди.

Танзила Норбоева бошчилигидаги парламент делегацияси 18−19 август кунлари Қозоғистон Парламенти Сенати раиси Маулен Ашимбаев таклифига биноан расмий ташриф билан Остона шаҳрида бўлиб турибди. Ташриф давомида у мамлакат президенти билан ҳам учрашган. Учрашувда стратегик шериклик ва иттифоқчилик муносабатларининг долзарб масалалари муҳокама қилинган.

«Сизнинг ташрифингиз мамлакатларимиз ўртасидаги дўстона муносабатларни мустаҳкамлаш нуқтаи назаридан жуда муҳим. Биз барча жиҳатдан Ўзбекистон билан ҳамкорликни ривожлантиришга алоҳида эътибор қаратамиз. Бу Марказий Осиёда барқарорлик ва хавфсизликни таъминлашнинг муҳим омили, деб ҳисоблаймиз. Мамлакатларимиз муносабатлари қанча яхши ва самарали бўлса, бутун минтақада вазият шунча тинч бўлади. Сизнинг ташрифингиз, айниқса, парламентлараро алоқаларни кучайтириш нуқтаи назаридан катта аҳамиятга эга», – деган Тўқаев.

Ўз навбатида Танзила Норбоева ҳам самимий қабул учун Қасим-Жомарт Токаевга миннатдорлик билдирган ва Президент Шавкат Мирзиёевнинг саломларини етказган.

«У киши сизга самимий саломлари ва юксак тилакларини йўлладилар. Шунингдек, эришилган барча келишувларни шахсан ўз назоратида ушлаб турганини билдирдилар. Биз Президентнинг бутун жамоаси сифатида, парламентни ҳам қўшган ҳолда, уларни амалга ошириш учун ишлаймиз. Қозоғистон Ўзбекистон учун, Ўзбекистон эса Қозоғистон учун – энг яқин ва ишончли ҳамкорлардир», – деди сенат раиси.

Қосим-Жомарт Тўқаев фурсатдан фойдаланиб, Президент Шавкат Мирзиёевга ҳам самимий тилакларини йўллади.

Маълумот учун, Танзила Норбоева 1956 йилда туғилган. 2010–2016 йилларда Ўзбекистон Касаба уюшмалари федерацияси кенгашига раҳбарлик қилган. 2016–2019 йилларда Ўзбекистон бош вазири ўринбосари – Хотин-қизлар қўмитаси раиси сифатида ишлаган. 2019 йилдан буён Ўзбекистон Олий Мажлиси сенатига раҳбарлик қилмоқда. 2020 ва 2024 йилларда қайта сайланиб, лавозимини сақлаб қолган.