Қорақалпоғистонда Оролбўйига бағишланган халқаро анжуман бошланди

Қорақалпоғистонда Орол туризм ҳафталиги бошланди. Ҳафталик доирасида 17-апрел куни Нукус шаҳрида “Оролбўйининг яхши ният элчилари” халқаро илмий-амалий конференсияси ўз ишини бошлади.

Тадбирда Экология, атроф-муҳитни муҳофаза қилиш ва иқлим ўзгариши вазирлиги, Қорақалпоғистон Республикаси Жўқорғи Кенгеси қўмитаси, Марказий Осиё атроф-муҳит ва иқлим ўзгаришини ўрганиш университети ("Греен Университй"), Оролбўйи халқаро инновацион маркази, Германия халқаро ҳамкорлик жамияти (ГИЗ), БМТТД, Гидрометеорология илмий-тадқиқот институти, Ўрмон хўжалиги илмий-тадқиқот институти, Ўзбекистон Республикаси Фанлар академияси Ботаника институти, Атроф-муҳит ва табиатни муҳофаза қилиш технологиялари илмий-тадқиқот институти, мамлакатимиз олий таълим муассасалари, халқаро ташкилотлар ва оммавий ахборот воситалари вакиллари иштирок этди.

“Бугунги кунда атроф-муҳитнинг ифлосланиши, иқлим ўзгариши ва табиий ресурслардан самарасиз фойдаланиш билан боғлиқ глобал муаммолар барқарор ривожланишга эътибор қаратиш, экология ва атроф-муҳитни муҳофаза қилиш соҳасида янги форматдаги мутахассислар ва экспертларни тайёрлаш, шунингдек, муаммоларни ҳал қилишда инновацион ёндашувларни жорий этишни талаб этмоқда, - деди Экология вазири Жусипбек Казбеков. - “Оролбўйи эзгу ният элчилари” халқаро илмий-амалий конференсияси эса айнан Оролбўйи минтақасидаги экология, атроф-муҳитни муҳофаза қилиш, табиатни бошқариш ва барқарор ривожланиш соҳасида миллий, минтақавий ва халқаро инновацион тизимларни қўллаб-қувватлаш учун янги билимларни татбиқ этиш ва фанлараро тадқиқотларни амалга оширишга хизмат қилади”.

Конференсия давомида иштирокчилар Оролбўйида амалга оширилаётган ишлар, Орол денгизи тубини ўрмонлаштиришнинг ўрни ва аҳамияти, Амударёнинг қуйи оқимидаги сув муаммолари ва уларни ҳал этиш йўллари, Оролбўйининг муҳофаза этиладиган ҳудудларида барқарор туризмни ривожлантириш истиқболлари ва бошқа маърузалардаги маърузалар билан танишдилар.

“Президентимиз Шавкат Мирзиёев жорий йилда Орол денгизининг қуриган тубида 100 минг гектар ўрмон плантациялари яратиш вазифасини қўйди. Биз аллақачон 156 минг гектар ўрмон плантацияларини барпо этдик. Уларнинг бир қисми авиация ёрдамида чигит экиш орқали яратилди. Жорий йилнинг баҳор фаслида ҳам кўчатлар экяпмиз. Шу мақсадда кўчатлар ва ўсимликларни етиштириш бўйича Халқаро марказ ташкил этишни ҳам режалаштирганмиз, – деди Ўрмон хўжалиги илмий-тадқиқот институти лаборатория мудири, қишлоқ хўжалиги фанлари доктори Зиновий Новитский. – Бундан ташқари, Қорақалпоғистонда янги йўналиш – асаларичиликни ривожлантиряпмиз. Айни пайтга қадар 2 минг гектардан ортиқ томорқа плантацияларини яратдик. Шуни таъкидлаш керакки, бир гектар гуллайдиган тамарикс ўсимлигидан 50 кг асал олиш мумкин. Шу боис жорий йилдан бошлаб Орол денгизи тубида асаларичиликни ривожлантирамиз”.

Маълумот учун, 2018–2023-йилларда Орол денгизи тубида 1 миллион 730 минг гектар ҳудудда ўрмон плантациялари ташкил этилиб, 17 минг квадрат километр майдон кўкаламзорлаштирилди. 2024-йилда эса жами 150-200 минг гектар майдонда ўрмонлар барпо этиш режалаштирилган.