Путинга кўпроқ аскар керак, лекин сафарбарлик хоҳламайди

Россия президенти Владимир Путин армияда жонли куч етишмаслиги билан боғлиқ жиддий муаммога дуч келди. Энди Россия ҳам, Украина ҳам жанговар ҳаракатларни давом эттириш учун янги ресурсларни излашга мажбур ва можарони тугатиш истиқболлари ноаниқ бўлиб қолмоқда, деб ёзади Newsweek.

2022 йил февраль ойидан бери Россия 665 мингдан ортиқ йўқотишга учради, хусусан, бир кун ичида мингдан ортиқ россиялик ҳарбий ҳалок бўлди ёки яраланди. Москва ўз йўқотишлари ҳақида батафсил маълумот бермаса-да, Россия томони мунтазам равишда кўплаб ҳалок бўлган ва яраланган украиналиклар ҳақида хабар беради - ҳар куни мингдан ортиқ.

Жанг майдонидаги қурбонлар ҳақидаги аниқ маълумотларни текшириш қийин. Бироқ Британия ҳукумати маълумотларига кўра, Россиянинг йўқотишлари 648 мингга яқинлашмоқда. Буюк Британиянинг Геостратегик маркази илмий ходими Уилям Фрирнинг таъкидлашича, Россия ҳам, Украина ҳам инсон ресурслари танқислигига дуч келмоқда.

Буюк Британия Мудофаа вазирлиги маълумотларига кўра, сентябрь ойида Россия бир ой ичида энг кўп йўқотишлар кўрган ва қишга қарамай, қурбонлар сонининг ўсиш тенденцияси йил охиригача давом этади.

Уруш давом этар экан, Россия қўшинларни тўлдиришнинг янги усулларини излашга мажбур бўлди. Кремль армияга ихтиёрий равишда киришни янада жозибадор қилишга умид қилмоқда, аммо Украинага чақирилувчиларни юбориш ёки сафарбарликнинг янги тўлқинини эълон қилиш каби оммабоп бўлмаган вариантларга ҳам эга.

Россия ҳарбийларни ёллаш учун бир нечта манбалардан фойдаланади. Булар мунтазам чақирилувчилар, шартномачилар, захирадагилар, шунингдек, "Вагнер" гуруҳи жангчилари каби ёлланма аскарлар ва юқори маош ва фуқаролик эвазига урушга қўшиладиган хорижликлардир.

Сафарбарлик Путин учун нозик масала бўлиб қолмоқда. Кузги чақирув пайтида 133 минг янги аскар қабул қилингани эълон қилинганига қарамай, чақирув ёшидаги эркакларнинг катта қисми хизматдан қочиш учун мамлакатни тарк этди. Ўтган йили Кремль чақирув қоғозларини электрон тарзда юбориш имконини берувчи янги қоидаларни жорий қилди, бу эса чақирувдан бўйин товлашга қарши курашишга ёрдам беради.