Путин ёқимли баёнотлар берди ва АҚШни ҳурмат қилишини яна бир бор таъкидлади — Доналд Трамп

Президент Доналд Трамп Россия раҳбари Владимир Путиннинг сўнгги баёнотига ижобий муносабат билдирди. Путин ушбу баёнотида Қўшма Штатларнинг ҳозирги президентига "ҳурмат" билан муносабатда бўлишини айтганди.

"Владимир Путин бугун жуда ёқимли баёнотлар берди. У яна мамлакатимизни ҳурмат қилишини айтди. Бир йил аввал у Қўшма Штатларни ҳурмат қилмасди, буни аниқ айта оламан. Лекин ҳозир Путин мамлакатимизни ҳурмат қилади. Хитой етакчиси Си Жинпин ҳам мамлакатимизни ҳурмат қилади. КХДР раҳбари Ким Чен Ин ҳам мамлакатимизни ҳурмат қилади. Улар яна мамлакатимизни ҳурмат қилмоқда. Бир йил аввал биз ҳурмат қилинадиган давлат эмас эдик", — дея таъкидлади АҚШ президенти.

Шундан сўнг Доналд Трамп яна собиқ президент Жо Байден маъмурияти АҚШ учун қанчалик ёмон ва зарарли бўлгани ҳақида гапирди.

Жума куни Путин журналистларга Трамп билан учрашувига ҳозирданоқ тайёрланаётганини айтиб, қуйидагича фикр билдирганди:

"Мен Қўшма Штатларнинг ҳозирги президентини жудаям ҳурмат қиламан. У ҳокимиятга ва Оқ уйга қайтиш учун жуда узоқ, қийин ва хавфли йўлни босиб ўтди. Трамп жасур инсон".