Путин Ўзбекистонга янги элчисини жўнатади

Россия президенти Владимир Путин 5 сентябрда Ўзбекистонга янги элчини тайинлашга доир ҳужжатни имзолади. Россиянинг Ўзбекистондаги элчихонасига энди 2017 йилдан бери Россиянинг Туркиядаги элчиси бўлиб ишлаб келган Алексей Владимирович Ерхов раҳбарлик қилади.

Алексей Ерхов 1960 йилда туғилган, Москва давлат халқаро муносабатлар институтини тамомлаган.

1983 йилдан бери дипломатик фаолият билан шуғулланиб келмоқда. У илгари Марокаш (1983−1987 йиллар), Миср (1990−1994 йиллар), Исроил (1996−2000 йиллар) элчихоналарида ишлаган.

2003−2006 йилларда Россиянинг Суриядаги элчихонаси маслаҳатчи-вакили, 2009−2015 йилларда Россиянинг Истанбулдаги бош консули бўлиб ишлаган.

2015−2017 йилларда Россия Ташқи ишлар вазирлигининг Вазият ва инқироз маркази департаменти директори бўлган.

Эслатиб ўтамиз, бунга қадар Россиянинг Ўзбекистондаги элчиси вазифасида ишлаган Олег Мальгинов жорий йилнинг июнь ойида миссиясини якунлаган эди.