Россия ва Мўғулистон президентлари – Владимир Путин ва Халтмаагиин Баттулга Россия Федерацияси ва Мўғулистон ўртасида дўстона муносабатлар ҳамда ҳар томонлама стратегик шериклик тўғрисида янги шартнома имзолашди. Маросим Россия раҳбари расмий ташриф билан келган Улан-Баторда жойлашган Давлат саройида бўлиб ўтган музокаралардан сўнг бўлиб ўтди. Бу ҳақда ТАСС агентлиги хабар бермоқда.
Путин олдинроқ Мўғулистоннинг «Одрийн Сонин» газетасига берган интервьюсида таъкидлаганидек, 1993 йилдаги Дўстлик ва Ҳамкорлик шартномаси асосида тайёрланган ушбу ҳужжат чексиз муддатга эга бўлади. Россия Федерацияси Президентининг сўзларига кўра, янги келишув икки томонлама муносабатларни сифат жиҳатдан янги босқичга олиб чиқади.
Россия Президентининг фикрича, Мўғулистон билан янги, доимий дўстлик шартномаси имзоланиши барча соҳалардаги ҳамкорликни кенгайтириш учун янги имкониятлар очади.
«Авваламбор, имзоланган шартномалар ичида давлатлараро Дўстлик тўғрисидаги битимни алоҳида таъкидлаб ўтаман. Ушбу муҳим ҳужжат Россия-Мўғулистон ҳамкорлигининг сифатли ва янги даражаларини, кенг қамровли стратегик шерикликни акс эттиради, уни турли йўналишларда янада кенгайтириш учун катта истиқболларни очиб беради», дейди Путин.
Россия Федерацияси Президенти узоқ вақтдан бери давом этиб келаётган дўстлик ва ўзаро даромад анъаналари Россия-Мўғулистон муносабатларини ривожлантириш учун мустаҳкам пойдевор эканлигига ишонч билдирди.