Путин: дунё Эрон халқининг матонати ва жасоратидан ҳайратда

Россия президенти Владимир Путин дунё Эрон халқи намоён этаётган жасорат ва матонатдан ҳайратда эканини билдирди. У бу ҳақда Валдай халқаро мунозара клубининг ялпи мажлисида айтди.

Путиннинг таъкидлашича, Эронда мамлакатни ҳимоя қилишга тайёр бўлган кадрлар захираси мавжуд. У бу салоҳият нафақат давлат бошқарувининг юқори даражаларида, балки қуролли кучлар ва Ислом инқилоби қўриқчилар корпусида ҳам борлигини қайд этди.

Россия раҳбари Москва Ҳурмуз бўғозининг имкон қадар тезроқ очилиши ва Эронга нисбатан санкциялар бекор қилинишидан умид қилаётганини билдирди. У барча муаммолар тинч йўл ва келишувлар асосида ҳал қилиниши кераклигини таъкидлади.

Путин, шунингдек, Эрон ядро дастури бўйича Россиянинг бойитилган ураннинг бир қисмини ўз ҳудудига олиб чиқиш ҳақидаги таклифи ҳануз кучда эканини айтди.

Россия президенти БМТ Хавфсизлик Кенгашини четлаб ўтиб қарор қабул қилиш мумкин эмаслигини таъкидлаб, ташкилотда Ҳиндистон, Африка давлатлари ва бошқа мамлакатларнинг вакиллигини кенгайтириш зарурлигини билдирди.

Шунингдек, Путин Россия, АҚШ ва Хитой ўртасида уч томонлама учрашув ўтказиш ғоясини қўллаб-қувватлашини, бироқ бундай мулоқот учун аввал кун тартибини белгилаб олиш кераклигини айтди.

Украинадаги можаро ҳақида гапирар экан, Путин Россия уни тинчлик музокаралари орқали имкон қадар тезроқ якунлашни исташини билдирди. У Украинанинг бетарафлик мақоми Москва талабларидан бири бўлиб қолишини ҳам таъкидлади.

Путиннинг айтишича, Россия қўшинлари сентябрь ойида Украинада 1301 квадрат километр ҳудуд устидан назорат ўрнатган. Унинг бу маълумоти Россия томонининг баёноти сифатида келтирилмоқда.

Россия президенти мамлакат иқтисодиётида муайян муаммолар мавжудлигини тан олган ҳолда, макроиқтисодий вазият барқарорлигини айтди. Путин давлат қарзи Россия ялпи ички маҳсулотининг тахминан 17 фоизини ташкил этишини маълум қилди.