Пекин Путиннинг Украинадаги хатоларини такрорлашни хоҳламайди

Тайван Хитойнинг ҳужумига тайёргарлик кўрмоқда,

​Тайпэй ХХР режими, хусусан, унинг амалдаги раҳбари эртами-кечми бостириб киришга уриниб кўришига шубҳа қилмайди. Бунинг учун Тайвандаги сиёсатчилар, разведкачилар, ҳарбийлар, бизнесменлар ва ҳатто пиарчилар Украинанинг Россия тажовузига кўрсатаётган қаршилигини диққат билан кузатиб бормоқда. Худди Пекин каби. Зеро, Хитой Халқ-озодлик армияси 1979 йилги Ветнам билан бўлган қисқа муддатли урушдан бери ҳарбий ҳаракатларда қатнашмаган.

​Хитой флоти Тайван атрофидаги сувларда мунтазам равишда жанговар отишмалар билан машғулотлар ўтказиб келмоқда. Хитой Ҳарбий-ҳаво кучлари орол атрофида тез-тез провокацион парвозлар уюштиради, унинг махсус топшириқли кучлари эса Тайпэйдаги президент офиси макетини эгаллашни намойишкорона машқ қилмоқда.

​Бироқ Тайван экспертлари ва давлат мулозимларининг аксарияти Си Жинпин 2027-2028 йилларда Тайван бўғозидан ўтишга буйруқ беради деб ҳисобламайди. Бунинг учун Пекинда ҳозирча етарли даражада тайёрланган денгиз пиёдалари ҳам, десант кемалари ёки баллистик ракеталар ҳам етарли эмас.​ Ҳужум қилиниши мумкин бўлган сана сифатида кўпроқ 2032-2035 йиллар тилга олинмоқда.