Patriot ишлаб чиқарувчилари Киевдан хавотирда

Patriot ишлаб чиқарувчилари Киев уларнинг ракеталарини такомиллаштириб, ўқ-дориларни тезроқ ва камроқ харажат билан чиқаришни бошлашидан хавотирда, деб ёзмоқда The Atlantic

​Patriot зенит-ракета комплексларининг Америкадаги ишлаб чиқарувчилари Raytheon ва Lockheed Martin компаниялари Украина лицензия олган тақдирда ракета-тутувчиларни такомиллаштириш йўлини топиб, сўнг уларни "АҚШдаги ишлаб чиқариш тармоқлари"га қараганда анча катта ҳажмда, тезроқ ва арзонроқ чиқаришни бошлашидан хавотирланмоқда.

​Шу билан бирга, АҚШ мудофаа компаниялари "ўз хавотирларини интеллектуал мулкнинг ўғирланиши ва технологияларнинг ўтиб кетиши билан расман асослашмоқда", дея нашр Киевга лицензия беришни қўллаб-қувватлаётган АҚШ Конгрессидаги республикачилардан бирининг сўзларидан иқтибос келтиради.

​Украина президенти Вашингтонга Patriot учун лицензия сўраб ҳали урушнинг биринчи йилида, президент Жо Байден давридаёқ мурожаат қилган эди, аммо ўшанда Киевга ҳеч қандай сабабларсиз рад жавоби берилган, деб хабар беради The Atlantic.

​"Ҳозир биз президент Трамп билан ушбу лицензияларни бериши бўйича келишиб олдик, аммо тасаввур қилинг, агар уларни тўрт йил олдин олганимизда натижалар бутунлай ўзгача бўлар эди. Ҳозир эса қоғозбозлик билан овора бўлиб турибмиз. Бизга қараб эса қоғоз парчаси ёки қоғоз ракета эмас, одамларни ўлдирадиган ҳақиқий ракета учиб келмоқда", — дея таъкидлади Украина етакчиси.

​Бироқ ҳозирча АҚШ президенти Доналд Трамп Киевга Patriot тизимлари учун ракета-тутувчиларни ишлаб чиқаришга лицензия беришга узил-кесил тайёрлигини тасдиқлагани йўқ. 6 март куни Трамп ушбу ракеталар АҚШнинг "ўзига кераклигини" маълум қилган эди.