Париждаги Миллий табиий тарих музейида (MNHN) душанбадан сешанбага ўтар кечаси ўғирлик содир бўлди.
Actu17 портали хабар беришича, етказилган зарар 600 минг еврога баҳоланмоқда.
Нашр манбаларига кўра, қароқчилар яхши тайёргарлик кўрган ва олтита олтин қуймасини олиб кетишга муваффақ бўлган. Воқеа юзасидан тергов ишларини суд полициясининг бандитизмга қарши бригадаси олиб бормоқда.
Август ойида France Info радиостанцияси MNHN бир неча ҳафта давом этган кенг кўламли киберҳужумга учрагани ҳақида хабар берган эди. Шу сабабли "тадқиқот, экспертиза, кутубхоналарнинг нормал ишлаши ва коллекциялар бўйича маслаҳат фаолияти учун зарур бўлган онлайн воситалар" мавжуд эмаслиги қайд этилди.
Миллий табиат тарихи музейи бир қанча музейлар, лабораториялар, кутубхоналар ва боғларни, жумладан Париждаги Ботаника боғи ва Винсен ҳайвонот боғини ўз ичига олган йирик илмий тадқиқот марказининг бир қисмидир.
