Олий Мажлис интеллектуал мулк бўйича қонун лойиҳасини иккинчи ўқишда қабул қилди

Мамлакатимизда интеллектуал мулк ҳимоясини таъминлаш, интеллектуал мулкка нисбатан ҳурмат ҳиссини шакллантириш, интеллектуал мулк эгаларининг қонуний манфаатларини ҳимоя қилиш борасида қатор ишлар амалга оширилмоқда. Олий Мажлис Қонунчилик палатасининг мажлисида кўриб чиқилган навбатдаги қонун лойиҳаси интеллектуал мулк ҳимоясини янада кучайтиришга қаратилган.

— Мазкур қонун лойиҳаси интеллектуал мулк объектларидан фойдаланишдаги ҳуқуқбузарликлар учун жавобгарликни қатъийлаштириш ва уни халқаро ҳуқуқ нормаларига мувофиқлаштириш мақсадида ишлаб чиқилган, — деди депутат Беҳзод Тўхтамуродов. — Амалдаги 4 та кодексга — Жиноят, Жиноят-процессуал, Маъмурий жавобгарлик тўғрисидаги ва Фуқаролик кодексларига муаллифлик ҳуқуқи ва турдош ҳуқуқларни, шунингдек, саноат мулки объектларига бўлган ҳуқуқларни бузганлик учун жавобгарликни кучайтиришни назарда тутувчи тегишли ўзгартириш ва қўшимчалар киритилмоқда.

Хусусан, Жиноят кодексининг 149-моддасига селекция ютуғи ва интеграл микросхема топологиясига нисбатан муаллифликни ўзлаштириб олиш учун жавобгарлик ўрнатилаётгани сабабли лойиҳани иккинчи ўқишга тайёрлаш жараёнида 149/3-моддасига тегишли ўзгартиришлар киритилмоқда.

Шунингдек, Маъмурий жавобгарлик тўғрисидаги кодекснинг 177-моддасига киритилаётган қўшимчага кўра, Ўзбекистон Республикасида рўйхатдан ўтказилмаган товар белгиси, хизмат кўрсатиш белгиси, географик кўрсаткич ва товар келиб чиққан жой номига нисбатан огоҳлантирувчи тамғадан қонунга хилоф равишда фойдаланиш учун жавобгарлик белгиланмоқда.

Мажлисда таъкидланганидек, қонун лойиҳасининг қабул қилиниши жамиятда интеллектуал мулк ҳуқуқига бўлган ҳурмат ҳиссини шакллантириш ва интеллектуал мулк эгаларининг моддий манфаатларини ҳимоя қилиш, соҳадаги жавобгарлик чораларини кучайтириш орқали контрафакт маҳсулотларнинг айланмасига чек қўйиш ва аҳолининг шу жумладан, тадбиркорлик субъектларининг интеллектуал мулк объектларидан қонуний фойдаланиш бўйича масъулиятини янада оширишга хизмат қилади.

Моддама-модда муҳокама ва савол-жавоблардан сўнг қонун лойиҳаси иккинчи ўқишда қабул қилинди.