Нурсултон Назарбоевнинг учинчи куёви ҳам курсисидан айрилди

Қозоғистоннинг собиқ президенти Нурсултон Назарбоевнинг учинчи куёви Тимур Кулибоев «Атамекен» миллий тадбиркорлар палатаси раҳбари лавозимини тарк этди. Кулибоевнинг тегишли мурожаати 17 январь, душанба куни палата сайтида эълон қилинди.

“Бугундан бошлаб мен «Атамекен» миллий тадбиркорлар палатаси президиумининг сайланган раиси лавозимини тарк этишга қарор қилдим”, — дейилади Кулибаев баёнотида. У қурултой делегатлари ва президиум аъзоларига билдирилган ишонч учун миннатдорлик билдириб, Миллий тадбиркорлар палатасининг олий назорат органига саккиз йил давомида раҳбарлик қилиш ўзи учун катта шараф ва масъулият эканини таъкидлади.

Тимур Кулибоев Қозоғистоннинг собиқ президенти Нурсултон Назарбоевнинг ўртанча қизи Динарага уйланган.

Эслатиб ўтамиз, аввалроқ Қозоғистоннинг собиқ президенти Нурсултон Назарбоевнинг куёвлари «Казтрансгаз» ва «Казтрансойл» миллий компанияларидан бўшатилгани маълум бўлган эди. Гап Дарига ва Алия Назарбоевларнинг эрлари ҳақида кетмоқда. Манбаларга кўра, «Казтрансойл» АЖ бош директори ва бошқаруви раиси Димаш Дўсанов ўз лавозимини йўқотган. Қайрат Шарипбоев ҳам ўз лавозимидан айрилди.

Кейинроқ Қозоғистон парламенти Мажлиси депутати Ерлан Саиров Назарбоевнинг куёвлари президентлик дастурини амалга ошириш жараёни доирасида йирик компаниялардаги раҳбарлик лавозимларидан бўшатилганини тушунтирди. «Мамлакат учун бу кадр ўзгаришлари катта аҳамиятга эга. Гап аслида Қозоғистон иқтисодиётини деолигархизация қилиш ҳақида кетмоқда. Жараёнлар бошланди», деди у.