Нега Хитой бойлари БААга кўчиб ўтмоқда?

Хитойнинг пулдор фуқаролари Форс кўрфази мамлакатларида яшаш ёки офис очишга уринишмоқда, деб ёзмоқда Financial Times.

Газетанинг таъкидлашича, узоқ вақт давомида Осиёнинг бой инсонлари учун Сингапур энг оммабоп мамлакат бўлган бўлса, ҳозирда ушбу тенденция ўзгарди.

Нашр суҳбатдошларининг сўзларига кўра, охирги йилларда Дубай ёки Абу-Дабига кўчиб ўтишни истаётган хитойликлар сони ошган. Бундан ташқари, Хитой бойлари фуқаролик олишни осонлаштириш имконини берадиган оилавий офислар ташкил этишга ҳаракат қилишмоқда.

БАА ҳукуматининг маълум қилишича, 2022 йилда хориж фуқароларига қарийб 80 мингта “олтин виза” берилган.

“Кўплаб оилалар БААга реинвестиция қилиш учун Сингапурдаги мулкларини сотишди”, — деди БААдаги M/HQ компанияси бошқарувчиси Ян Мразек.

Унинг сўзларига кўра, Хитой ва Сингапурдаги қатъий карантин чоралари хитойликларнинг БААга дастлабки қизиқишларига сабаб бўлган.