"Моссад" жосусларига 100 йиллик қамоқ жазоси тайинланди

Туркияда уч кишилик оила ва яна уч нафар фуқаро Исроилнинг "Моссад" ташқи разведка хизмати фойдасига жосуслик қилгани ҳамда турли объектлар ҳақида махфий маълумотлар тўплагани учун жами 100 йиллик қамоқ жазосига ҳукм этилди, деб хабар қилмоқда Туркия оммавий ахборот воситалари.

2024 йил апрель ойида узоқ муддатли кузатувдан сўнг Туркия Миллий разведка ташкилоти (МİТ) Истанбулда саккиз кишини ҳибсга олди. Маҳкумлар орасида суғурта компанияси эгаси Аҳмет Эрсин Тумлужали ҳам бор. У "Моссад" учун ишлайдиган ходимлар тармоғини, жумладан, хотини ва ўгай қизини бошқаргани учун 22 ярим йиллик қамоқ жазосига ҳукм қилинди.

Истанбулдаги оғир жиноятлар суди қарори билан Тумлужалининг "яхши хулқи" учун жазоси 18 йил-у тўққиз ойга қисқартирилди. Унинг хотини Бенан Тумлужали 16 йил-у саккиз ойга, қизи Дила Султон Шимшек эса 15 йил-у етти ой-у 15 кунлик қамоқ жазосига ҳукм этилди.

Қолган уч ҳамтовоқ - Жем Ўзкан, Ўзкан Арикан ва Фузулий Шимшек ҳар бири 15 йил-у етти ой-у 15 кунлик қамоқ жазосига маҳкум қилинди.

Ҳукмга кўра, барча айбдорлар Исроил разведкаси фойдасига жосуслик қилган, махфий маълумотлар тўплаган, шунингдек, объектларни суратга олган. Суднинг таъкидлашича: "Гумонланувчилар мамлакатдаги чет элликлар, айниқса, низолар туфайли ўз юртларидан қочиб келганлар ҳақида маълумот йиғиш билан шуғулланган ва бу разведка маълумотларини "Моссад" билан баҳам кўрган."

Ҳукмга кўра, Тумлужали Ёрг деган код номи остида Исроиллик куратор билан алоқада бўлган. Бундан ташқари, асосий айбланувчи 2017 ва 2020 йилларда Вена ва Франкфуртда Исроил разведкасининг Гевин Алфрон исмли бошқа ходими билан учрашган.

Кузатув объектларининг баъзилари Озарбайжон, Иордания, Ливан ва Сурия фуқаролари бўлган. 2014 йилдан 2019 йилгача унинг рафиқаси Бенаннинг банк ҳисобига катта миқдордаги маблағлар келиб тушган. Айблов хулосасида таъкидланишича, бир ҳолатда Тумлужали 300 минг евро (333 282 АҚШ доллари) миқдорида пул олган.