МИБ “фирибгар”дан ҳам моддий зарарни ундирди

Ҳар бир инсон ўзининг кичкина дунёси - яъни яшайдиган шахсий уйи бўлишини орзу қилади. Шу ниятда, Музработ туманида яшайдиган А.Т. ҳам оила қуриб, фарзандли бўлганидан сўнг, яшаш жойи сотиб олишни режалаштиради.

Туман марказидаги янги кўп қаватли уйлардан бирини сотиб олиш учун А.Т. уй эгаси Н.Т. билан келишиб, тўловнинг бир қисмини амалга оширади. Ниҳоят, ўз уйига эга бўлдим, деб хурсанд бўлган чоғида, кутилмаган ҳодиса юз беради - уйнинг иккинчи "харидори" пайдо бўлади.

Текширувлар натижасида, Н.Т. бир уйни иккита харидорга ваъда қилиб, иккаласидан ҳам пул олгани маълум бўлади. Ҳолат юзасидан жиноят иши қўзғатилиб, суд Н.Т.га нисбатан жазо чораларини қўллайди. Жабрланувчи А.Т. фойдасига эса 70 миллион сўм моддий зарар ундирилиши белгиланади.

Бироқ, ижро ҳужжати бўйича қарздорлик ихтиёрий равишда амалга оширилмаганлиги сабабли, Бюронинг Музработ туман бўлими томонидан мажбурий ижро ҳаракатлари амалга оширилди ва натижада фуқаро фойдасига 70 миллион сўм тўлиқ ундирилиши таъминланди.
Фуқаро А.Т. бузилган ҳуқуқлари тикланганидан хурсанд эканлигини билдириб, бошқаларни уй сотиб олишда керакли ҳужжатларни текшириб, эътиборли бўлишга чақирди.