Месси Аргентина терма жамоаси сардори бўлади

Аргентина терма жамоаси бош мураббийи Лионель Скалони 2026 йилги Жаҳон чемпионати учун 26 нафар футболчидан иборат таркибни эълон қилди ва Лионель Месси турнирда жамоа сардори бўлишини тасдиқлади.

Бу Месси учун фаолиятидаги олтинчи Жаҳон чемпионати бўлади. Шу тариқа, у португалиялик Криштиану Роналду ва мексикалик Гильермо Очоа билан биргаликда жаҳон футболи тарихида олтита мундиалда иштирок этган илк футболчилар қаторидан жой олмоқда.

Сўнгги кунларда Мессининг соғлиғи борасида хавотирлар бор эди. Тиббий кўриклар унинг чап сон мушакларида чарчоқ борлигини аниқлаганди. Бироқ Скалони бу муаммолар жиддий эмаслигини ва футболчи турнирда тўлиқ ёрдам бера олишини таъкидлади.

Эслатиб ўтамиз, Аргентина терма жамоаси Қатардаги мундиал финалида Францияни пенальтилар сериясида мағлуб этиб, амалдаги чемпион сифатида ушбу турнирга ташриф буюрмоқда.