“Magic City” боғида ўз жонига қасд қилиш саҳнаси намойиш этилган томоша юзасидан Болалар омбудсмани текширув сўради

Ижтимоий тармоқларда Тошкент шаҳрида жойлашган “Magic City” боғида намойиш этилган театрлаштирилган томошанинг видеолавҳаси тарқалди. Унда ўз жонига қасд қилиш саҳнаси саҳналаштирилгани акс этган. Энг хавотирлиси — ушбу томошада катталар билан бир қаторда ёш болалар ҳам иштирок этгани маълум қилинди.

Шу муносабат билан, Ўзбекистон Республикаси Болалар омбудсмани ҳолат юзасидан расмий баёнот билан чиқди.

Маълумот учун:

• “Болаларни уларнинг соғлиғига зарар етказувчи ахборотдан ҳимоя қилиш тўғрисида”ги Қонуннинг 16-моддасига кўра, болаларни ўз жонига қасд қилишга ундайдиган ахборот маҳсулотини тарқатиш тақиқланади.

• 19-модда эса жамоат жойларида бундай ахборотни кўрсатиш учун махсус ҳимоя чоралари ва техник воситалар зарурлигини белгилайди.

• Шунингдек, Вазирлар Маҳкамасининг 2014 йил 29 июлдаги 205-сон қарори билан тасдиқланган “Оммавий тадбирларни ўтказиш қоидалари”нинг 59-бандига кўра, одамлар ҳаёти ва соғлиғига таҳдид солувчи ҳар қандай ҳаракат тақиқланади.

Болалар омбудсмани қуйидаги чораларни амалга оширди:

1. “Magic City” дирекциясидан мазкур воқеа юзасидан расмий муносабат билдириш ёки тушунтириш беришни сўради;

2. Қонунбузилиш ҳолати мавжудлиги ёки йўқлигини ўрганиш ва зарур бўлса, қонуний чоралар кўриш учун прокуратура органларига мурожаат йўллади.