Львов шаҳрининг аҳолиси сувсиз қолди

Украина ғарбидаги Львов шаҳрида магистраль қувурнинг катта ёрилиши 50 мингга яқин мижозни сувсиз қолдирди.

Бу ҳақда шаҳар ҳокимининг биринчи ўринбосари Андрей Москаленко маълум қилди.

"Айни пайтда 50 мингга яқин абонент сувсиз қолмоқда. Муаммо нимада? Аввалги ёрилишдан кейин сув тикланганида, эски қувурлар туфайли ёрилиш юз берган", - дейди у.

Расмийнинг таъкидлашича, барча эскирган қувурларни алмаштириш учун 10 миллиард гривна (238,7 миллион доллар) керак бўлади, бу маблағ шаҳар бюджетида йўқ.

"Львовводоканал" маълумотларига кўра, ёрилиш сўнгги ўн йилликлардаги энг каттаси. Дастлаб Домажир қишлоғида диаметри 600 мм бўлган магистраль сув қувури ёрилиб, Львов яқинидаги 13 қишлоқ, шунингдек, вилоят марказининг бир неча кўчалари сувсиз қолган. Таъмирлашдан кейин баъзи қишлоқлар сув олди, бироқ яна бир нечта ёрилишлар юз берди.

25 октябрь куни эрталаб коммунал хизматчилар навбатдаги таъмирлаш ишларини якунлаб, 30 километрдан ортиқ магистраль линиялар ва йирик сув омборларини тўлиқ бўшатган авариядан сўнг тизимни босқичма-босқич тўлдиришни бошладилар.

Бироқ бу жараён давомида Домажир қишлоғи яқинида яна бир магистраль сув қувури ёрилиб, насос станцияларида босим тушиб кетган.

Компаниянинг таъкидлашича, улар ҳеч қачон бундай ҳолатга дуч келмаганлар.

"Биз тан олишга мажбурмиз: "Львовводоканал" сўнгги ўн йилликлардаги шаҳарни сув таъминоти бўйича энг жиддий муаммога дуч келмоқда. Ҳатто компания фахрийлари ҳам шаҳарнинг бир қисми уч кун давомида сувсиз қолган ва қайта-қайта содир бўлган бахциз ҳодисалар таъминотни барқарорлаштиришга тўсқинлик қилган вазиятларни эслай олмайди", - дейилади баёнотда.

Коммунал хизматчиларнинг қўшимча қилишича, марказлаштирилган сув таъминоти тикланмагунча сув ташувчи автомашиналар ишлашда давом этади.