Ҳароратнинг ўзгариши ва қуёш нури етишмаслиги даврида мувозанатли овқатланиш ва истеъмол қилинадиган оқсиллар, ёғлар, углеводлар, шунингдек витаминлар ва минераллар миқдорини кузатиб бориш муҳим, чунки куз мавсумий касалликлар вақтидир.
“Кўплаб микроэлементларни ўз ичига олган мавсумий маҳсулотларга эътибор қаратиш лозим. Помидор ва бодрингни C, А витамини, фолий кислотаси ва калийга бой қовоқ билан алмаштириш мумкин. Ёки B витамини, аскорбин кислотаси, A вa E витаминлари, темир, магний ва цинкни ўз ичига олган қовоқча (кабачка) паст калориялилиги билан афзал саналади”, — дейди диетолог Евгения Белюга.
Унинг таъкидлашича, сиз таомномангизни мавсумий таомлар билан уйғунлаштиришингиз мумкин, масалан, пюре шўрвалар куз учун жуда яхши таом саналади. Сабзавотли шўрва кўплаб фойдали витаминларни ўз ичига олади, кам ёғли товуқ шўрваси ҳам вазн йўқотадиганлар учун мос келади.
“Агар ичимликлар ҳақида гапирадиган бўлсак, чой қаҳвага фойдали муқобил бўлиши мумкин. Чой совуқ ҳавода иммунитет тизимини қўллаб-қувватлайдиган витаминлар, полифеноллар, антиоксидантларни ўз ичига олади. Лимон, атиргул қўшиб тайёрланган чой таркибидаги С витамини иммунитет тизимини мустаҳкамлашга ёрдам беради”, — дея тавсия қилди мутахассис.
“Аммо шакар истеъмолини камайтириш яхшироқдир.
Шакар юқори калорияли маҳсулот бўлиб, уни ортиқча истеъмол қилиш вазн ортишига олиб келади, бу эса янги муаммоларни келтириб чиқариши мумкин: метаболизм секинлашиши, ҳужайраларнинг инсулинга сезувчанлигининг пасайиши ва пировардида 2-тоифа диабет. Шакарни кўп миқдорда истеъмол қилиш орқали биз иммун тизимимиз фаолиятини бузишимиз мумкин ва бу ҳолатда мавсумий касалликлар пайтида вирусларга қарши туриш қийинроқ бўлади”, — дея хулоса қилди эксперт.
