Кремлга Telegram'нинг секинлашуви таъсир қилмаган

Россия президенти матбуот котиби Дмитрий Песковнинг журналистларга маълум қилишича, Кремл ўз расмий Telegram-каналини юритишда қийинчиликларга дуч келмаяпти.

Шунингдек, Песков Кремл прокси ва VPN хизматларидан фойдаланганини инкор қилмади.

10 феврал куни Роскомнадзор Россияда Теlegram'нинг секинлашгани ҳақидаги маълумотни расман тасдиқлади. Идора бу чоралар Россия қонунчилиги бузилишига ва фуқаролар хавфсизлигига нисбатан таҳдидларга қарши қўлланилганини билдирди.

Интернет-цензура бўйича экспертларнинг фикрича, Россия расмийларининг асл мақсади мамлакат ҳудудидаги фойдаланувчиларни давлат назорати остидаги мессенжерларга, биринчи навбатда Мах ва VK'га ўтказиш учун Telegram'ни босқичма-босқич сиқиб чиқариш орқали шароит яратишдир.