Киевда 1 миллиондан ортиқ аҳоли электр таъминотисиз қолди

Украина президенти Владимир Зеленскийнинг маълум қилишича, Украина пойтахтида 4 мингдан ортиқ кўп қаватли уйда иситиш тизими ишламаяпти. Россия ҳужумининг оқибатларини бартараф этиш камида бир неча кун вақт олади. Қайта тиклаш ишларига маҳаллий ҳокимият вакиллари ва давлат идоралари ходимлари тўлиқ жалб этилади.

Маълумотларга кўра, 20 январга ўтар кечаси Россия яна бир бор Украинадаги энергетика инфратузилмаси объектларига зарба берган. Киев расмийлари шаҳарда 5635 та кўп қаватли уй иситиш тизимидан узилганини, бу пойтахтдаги бундай турдаги уйларнинг ярмидан кўпини ташкил этишини билдирган.

Шунингдек, Украина Олий Радаси биносида ҳам иссиқлик, электр энергияси ва сув таъминоти вақтинча узилган.

Россия армияси 20 январ кечаси Украинага ракета ва дронлардан зарбалар берган. Украина Қуролли кучлари Ҳаво кучлари маълумотларига кўра, бу пайтда 342 та нишон уриб туширилган ёки бостирилган: 315 та дрон, 13 та Х-101 қанотли ракетаси ва 14 та “Искандер” баллистик ракетаси. Ҳужумнинг асосий йўналиши Киев шаҳри ва вилояти бўлган.