Кац Эронга «вайронкор зарба» билан таҳдид қилди

Исроил мудофаа вазири Исраэль Кац Теҳрон Исроилга яна бир бор ҳужум қилса, кескин жавобга дуч келишини билдирди.

Шу билан бирга, у маҳаллий оммавий ахборот воситаларини Исроил ҳарбийларининг эълон қилинган ютуқларини етарлича ёритмаётгани учун танқид қилди.

«Агар Эрон Исроилга ҳужум қилса, вайронкор зарба олади ва улар буни жуда яхши билишади», — деди Кац Исроилнинг Channel 14 телеканалига берган интервьюсида.

Эрон билан муносабатлардаги ҳозирги кескинлик ҳақида гапирар экан, вазир ҳукумат ҳарбий ҳаракатлар натижалари ҳақида жамоатчиликни хабардор қилишда давом этишини ҳам таъкидлади.

Кац маълум қилган натижалар қаторида Эроннинг олий раҳбари оятулло Али Хоманаий ва бошқа юқори лавозимли эронлик раҳбарлар ўлдирилганини ҳам тилга олди.

Унинг қўшимча қилишича, Исроил хавфсизлик тузилмалари вакиллари АҚШ президенти Дональд Трампнинг Эронга қарши аввал режалаштирилган кенг кўламли ҳарбий операциядан воз кечиш қарорига салбий муносабат билдирган.

Бундан аввал Исроил ОАВ АҚШнинг Эронга қарши кенг миқёсли зарба бериш эҳтимоли, шунингдек, Исроилнинг жанговар шайлик даражасини энг юқори босқичга кўтаргани ҳақида хабар берган эди.

31 июль куни Трамп АҚШ Эрон таҳдид солишдан тўхтамагунича унга «жуда қаттиқ зарбалар» беришини айтган. Унинг сўзларига кўра, вазият ривожи «АҚШ учун жуда муваффақиятли кечмоқда».