Kas Eronga «vayronkor zarba» bilan tahdid qildi

Isroil mudofaa vaziri Israel Kas Tehron Isroilga yana bir bor hujum qilsa, keskin javobga duch kelishini bildirdi.

Shu bilan birga, u mahalliy ommaviy axborot vositalarini Isroil harbiylarining e’lon qilingan yutuqlarini yetarlicha yoritmayotgani uchun tanqid qildi.

«Agar Eron Isroilga hujum qilsa, vayronkor zarba oladi va ular buni juda yaxshi bilishadi», — dedi Kas Isroilning Channel 14 telekanaliga bergan intervyusida.

Eron bilan munosabatlardagi hozirgi keskinlik haqida gapirar ekan, vazir hukumat harbiy harakatlar natijalari haqida jamoatchilikni xabardor qilishda davom etishini ham ta’kidladi.

Kas ma’lum qilgan natijalar qatorida Eronning oliy rahbari oyatullo Ali Xomanaiy va boshqa yuqori lavozimli eronlik rahbarlar o‘ldirilganini ham tilga oldi.

Uning qo‘shimcha qilishicha, Isroil xavfsizlik tuzilmalari vakillari AQSh prezidenti Donald Trampning Eronga qarshi avval rejalashtirilgan keng ko‘lamli harbiy operasiyadan voz kechish qaroriga salbiy munosabat bildirgan.

Bundan avval Isroil OAV AQShning Eronga qarshi keng miqyosli zarba berish ehtimoli, shuningdek, Isroilning jangovar shaylik darajasini eng yuqori bosqichga ko‘targani haqida xabar bergan edi.

31 iyul kuni Tramp AQSh Eron tahdid solishdan to‘xtamagunicha unga «juda qattiq zarbalar» berishini aytgan. Uning so‘zlariga ko‘ra, vaziyat rivoji «AQSh uchun juda muvaffaqiyatli kechmoqda».