Исроилда “мияни еювчи” амёбадан ўлим қайд этилди

Исроилда “мияни еювчи” амёба (Naegleria fowleri) билан касалланган йигит бир неча кун ўтиб энсефалитдан вафот этди. Бу ҳақда The Times of Israel хабар берди.

Бу Исроилда қайд этилган паразит билан касалланишнинг иккинчи ҳолатидир. 26 ёшли исроиллик 2 июль куни иситма, бош оғриғи ва кўнгил айниш аломатлари билан касалхонага ётқизилган. Амёба билан касалланиш мамлакат шимолидаги Киннерет кўлида сузиш пайтида содир бўлган. У ерда ёзда сув ҳарорати 30 даражага етади, бу эса микроорганизмларнинг ривожланиши учун қулай муҳит ҳисобланади.

Исроил Соғлиқни сақлаш вазирлиги инспекторлари эркак сузган пляждан намуналар олган, бироқ сув амёба билан ифлослангани белгилари аниқланмаган.

Шифокорлар касалхонага ётқизилганидан бери беморнинг ҳаётини сақлаб қолиш учун ўз ихтиёридаги барча воситалардан, шу жумладан дори-дармонлар билан даволаш ва жарроҳлик аралашувларидан фойдаланган, аммо унинг аҳволи ёмонлашишда давом этган, — дейилади Бэйлинсон шифохонаси баёнотида.

АҚШ Касалликларни назорат қилиш ва олдини олиш марказлари маълумотига кўра, дунё бўйлаб Naegleria fowleri инфекциясининг атиги 400 га яқин ҳолати қайд этилган. Исроилда ушбу инфекциянинг биринчи ҳолати 2022 йил август ойида кузатилган, ўшанда ҳам йигит паразит келтириб чиқарадиган энсефалитдан вафот этган. Тиббий муолажаларга қарамай, Naegleria fowleri инфекциясидан ўлим даражаси 97 фоиздан ошади. Инфекция бурун йўллари орқали инсон танасига, шундан сўнг мияга киради.