Испания Суперкубоги-2026 мусобақасида қатнашувчилар ва жуфтликлар аниқ бўлди

2026 йилда бўлиб ўтадиган Испания Суперкубоги мусобақасида қатнашадиган барча жамоалар ва ярим финал жуфтликлари маълум бўлди.

Мусобақада тўрт жамоа иштирок этади: Каталониянинг «Барселона»си, Мадриднинг «Реал» ва «Атлетико» жамоалари ҳамда Бильбао шаҳрининг «Атлетик» клуби.

Маълумки, Суперкубокнинг стандарт форматига кўра, Испания чемпионатининг икки етакчи жамоаси ва мамлакат Кубоги финалчилари иштирок этади. Бироқ бу йил «Барселона» ва «Реал» Ла Лиганинг биринчи ва иккинчи ўринларини эгаллаган ҳамда Кубок финалида ўйнагани сабабли, Суперкубокда лиганинг учинчи ва тўртинчи ўринларини эгаллаган жамоалар — «Атлетико» ва «Атлетик» иштирок этади.

Журналист Mister Chip'нинг ижтимоий тармоқларда маълум қилишича, ярим финалнинг биринчи учрашувида Мадриднинг икки жамоаси — «Реал» ва «Атлетико» тўқнаш келади. Иккинчи ярим финалда эса «Барселона» ва Бильбаонинг «Атлетик» жамоаси ўзаро баҳс олиб боради.

Эслатиб ўтамиз, мусобақа 2026 йилнинг январь ойида бўлиб ўтади. 2022 йилдан бери Испания Суперкубоги Саудия Арабистонида ўтказиб келинмоқда. Мазкур мусобақанинг амалдаги ғолиби — «Барселона» бўлиб, у финалда «Реал»ни 5:2 ҳисобида мағлуб этган эди.