Императорга тегишли қилич кимошдида рекорд даражада баҳоланди

Париждаги аукционда Наполеоннинг қиличи 4,7 млн еврога сотилди.

Парижда Франция императори Наполеон I Бонапартнинг қиличи 4,7 миллион еврога сотилди. Бу ҳақда Hotel Drouot кимошди майдончасига таяниб, Le Figaro хабар берди.

Қайд этилишича, қурол дастлаб 700 минг евродан 1 миллион еврогача баҳоланган ва у «Наполеоннинг аукционда сотилган энг қиммат артефактларидан» бирига айланган.

— Сумма 2007 йилда 4,8 миллион еврога сотилган Маренго жангидаги қилич рекордига яқинлашди, — дейилади хабарда.

Кимошди савдоси орқали сотилган қилич Наполеоннинг шахсий қуроли бўлган. Бонапарт 1802-1803 йилларда Версал мануфактураси директори Николя-Ноэл Бутедан қурол буюртма қилган. Император бўлганидан кейин ҳам Наполеон I қилични ҳукмронлигининг охирига қадар сақлаган. Кейин эса уни маршал Эммануэл де Грушига совға қилган. Шундан буён қурол ҳарбий саркарданинг авлодлари томонидан сақлаб келинган.

Аукционда сотилган мазкур қиличнинг иккинчи нусхаси Санкт-Петербургдаги Эрмитаж музейида сақланади.

2021 йилда Бонапартнинг парад қиличи ва 5 та тўппончаси 2,87 миллион долларга сотилган эди. Наполеон ушбу қуроллардан 1799 йилдаги давлат тўнтаруви вақтида фойдаланган.