Ҳўрмуз бўғозида танкер мина сабаб портлаб кетди — Tasnim

"Америка армияси таъсирида бўлган" учта нефт танкери Хўрмуз бўғозининг жанубий қисмидаги миналаштирилган ҳудуддан ўтишга уринган.

"Бироқ танкерлардан бирида портлаш ва кучли ёнғин чиққач, қолган икки кема ортга қайтди", дейилади Эроннинг Tasnim давлат агентлиги эълон қилган Ислом инқилоби қўриқчилари корпуси (ИИҚК) баёнотида.

​Эрон АҚШ минтақадаги "тажовузкор ҳаракатларини" тўхтатмагунича Хўрмуз бўғози блокадасини давом эттиришини билдирган. ИИҚК, шунингдек, бошқа кемаларни ҳам Эрон томони билан келишмасдан бўғоздан ўтишга уринмасликдан огоҳлантирди.

​Бундан ташқари, Financial Times Европа космик агентлиги суратларига таяниб, Эрон кучлари Грециянинг Kavomaleas танкерини эгаллаб олгани ҳақида хабар берди. FT маълумотларига кўра, кемага иккита снаряд келиб теккан, натижада ёнғин чиқиб, экипаж эвакуация қилинган. АҚШ ва Исроилнинг Эронга қарши ҳарбий ҳаракатлари бошланганидан бери жами 45 та кемага ҳужум қилинган бўлса, танкернинг қўлга олиниши шу пайтгача қайд этилган учинчи ҳолатдир.