Гутерриш Трамп таҳдидларига жавоб бериши керак - Эроннинг БМТдаги вакили

Эрон Ислом Республикасининг БМТдаги доимий вакили Амир Саид Ирвоний ташкилот бош котибига хат йўллади. Мактубда таъкидланишича, БМТ Хавфсизлик Кенгаши АҚШ президенти Дональд Трампнинг Эрон ядровий дастури бўйича эълон қилган баёнотини қоралаши керак.

Аввалроқ, Трамп агар мамлакат ядровий дастур бўйича келишувга рози бўлмаса, Эрон бомбаланади, деб баёнот берганди. Эрон бу ҳолатни БМТ Низомининг бузилиши деб ҳисоблашини маълум қилган.

Эроннинг доимий вакили БМТ Хавфсизлик Кенгашининг доимий аъзоси бўлган давлат президентининг баёноти ҳар қандай давлатнинг сиёсий мустақиллигига қарши куч қўллаш таҳдиди ҳақидаги тақиқни бузаётганига эътибор қаратди.

Ҳужжатда айтилишича, Трампнинг бошқа давлатлар ҳақидаги мулоҳазалари хавфли вазиятни келтириб чиқаради.

– Хавфсизлик Кенгаши АҚШ етакчисининг таҳдидларини халқаро ҳуқуқ ва БМТ Низомининг бузилиши сифатида сўзсиз қоралаши керак, - дейилади мактубда.

Дипломатнинг сўзларига кўра, Эрон минтақада тинчлик ва барқарорлик тарафдори, бироқ Қўшма Штатлар ёки Исроилнинг ҳар қандай тажовуз ёки ҳужумига тез ва қатъий жавоб қайтаради.