Green card лотереясида иштирок этиш қоидалари янгиланади

АҚШ ҳукумати Green card лотереясида иштирок этиш қоидаларини янгилашни режалаштирмоқда.

Ўзгаришлар 2026 йил 10 апрелдан кучга кириши мумкин ва DV-2027 лотереясига тааллуқли бўлиши кутилмоқда. Тегишли лойиҳа АҚШ Федерал реестри сайтида эълон қилинди.

Унга кўра, Diversity Visa Program'да (Green card лотереяси) иштирок этиш учун амал қилувчи хорижга чиқиш паспорти талаб қилинади. Анкетага паспортнинг шахсий маълумотлар ва имзо жойлашган саҳифасининг сканерланган нусхасини бириктириш керак бўлади.

Шунингдек, ариза топшириш учун рамзий тўлов – 1 доллар жорий этиш таклиф қилинмоқда. Яна бир ўзгариш анкета тўлдириш вақтига тегишли. Ҳозир бунинг учун 30 дақиқа берилади, янги қоидаларга кўра эса бу муддатни 90 дақиқагача узайтириш режалаштирилган.

АҚШ Давлат департаментининг маълум қилишича, бу чоралар фирибгарлик билан берилган аризалар сонини камайтириш ва дастур шаффофлигини оширишга ёрдам беради. Шу билан бирга, дастур қоидаларида “гендер” ва “ёш” ўрнига “биологик жинс” ва “туғилган сана” атамаларини ишлатиш режалаштирилган.

Консулликлар учун йўриқномаларга ҳам “shall” (“мажбур”) деган қоида қўшилмоқда. Бу консуллик ходимлари иштирокчилар маълумотларини қатъий текшириши шартлигини англатади.