Францияда собиқ президент Саркозини қўллаб-қувватлаш митинги бўлиб ўтди

Францияда “Ливия иши” деб аталган жиноий ташкилот тузганликда айбланиб, беш йилга озодликдан маҳрум этилган собиқ президент Николя Саркозини қўллаб-қувватлаш учун митинг бўлиб ўтди.

Саркозининг ўғиллари Луи, Пьер ва Жаннинг чақируви билан собиқ президентнинг тарафдорлари унинг Парижнинг 16-округидаги уйи олдида тўпланишди. Норозилик намойиши Саркози “Ла Санте” қамоқхонасига келиши режалаштирилган соат 10:00 да бошланди.

Франция байроқларини кўтарган намойишчилар собиқ давлат раҳбарини қўллаб-қувватловчи шiorлар айтишди. “Николя!”, “Адолатга уят!” каби бақириқлар остида юзлаб одамлар иштирок этди. Айрим иштирокчилар “Адолатга шармандалик. Президент қамоқда!” деган ёзувларни кўтаришди.

Саркозининг ўғиллари эрталаб отасининг уйига келиб, у қамоқхонага йўл олишидан олдин хайрлашишди. Саркози рафиқаси Карла Бруни ҳамроҳлигида уйидан чиқиб, йиғилганларга салом берди ва қамоқхонага йўл олди.

Франция матбуотига кўра, собиқ президент 11 метрли, ойнаси бор бир кишилик камерада жазосини ўтайди.

Саркозига қўйилган айбловлар

2007–2012 йилларда Франция президенти бўлган Николя Саркози 2007 йилги сайлов кампанияси учун Ливия собиқ раҳбари Муаммар Қаддафийдан ноқонуний маблағ олганликда айбланган эди.

2013 йилда бошланган тергов сўнгра “Ливия иши” номи билан оммага маълум бўлди.
25 сентябрь куни Париж жиноий суди Саркозини жиноий ташкилот тузишда айбдор деб топди ва беш йилга озодликдан маҳрум этди.

Суд уни айрим моддалар бўйича оқлаган бўлса-да, ҳукм дарҳол ижро этилиши белгиланди.
Апелляция берилганига қарамай, Саркози кассация жараёни тугунча қамоқда қолиши лозим бўлади.