Франция Макронни импичмент қилиш бўйича резолюцияни кўриб чиқади

18 сентябр, сешанба куни Франция Миллий ассамблеяси – парламент қуйи палатаси "Бўйсунмайдиган Франция" чап қанот партияси томонидан таклиф этилган президент Эммануэль Макронга импичмент эълон қилиш резолюциясини муҳокама қилади.

Бу ташаббус Макрон парламент сайловларида ўз коалицияси муваффақиятга эришганига қарамай, сўл партия вакилларини янги ҳукумат таркибидан чиқариб ташлаганидан кейин илгари сурилган.

Ҳужжат Франция Конституциясининг 68-моддасига мувофиқ тайёрланган бўлиб, президент ўз вазифаларини бузган тақдирда уни лавозимидан четлатиш имконини беради. Резолюцияни "Янги халқ фронти" блокининг 81 нафар депутати, жумладан, "Бўйсунмайдиган Франция"нинг 72 нафар вакили, шунингдек, "Яшиллар" партияси ҳамда "Сўл демократлар ва республикачилар" гуруҳининг айрим депутатлари қўллаб-қувватлади.

Бюро, қуйи палатанинг олий коллегиал органи бўлиб, унда 22 аъзодан 12 нафари чап томонни ифодалайди, резолюциянинг қабул қилиниши мумкинлиги тўғрисида қарор қабул қилиши керак. Бироқ социалистлар Меланшон ташаббусини қўллаб-қувватлашдан бош тортдилар, собиқ президент, ҳозир эса депутат Франсуа Олланд, шунингдек, Яшиллар етакчиси Марин Тонделье бунга қарши чиқди.

Агар резолюция ушбу босқичдан ўтиб кеца, у 73 депутатдан иборат қонунчилик қўмитаси томонидан маъқулланиши керак, бунда чаплар атиги 24 ўринга эга. Шундан сўнг Миллий ассамблеянинг учдан икки қисми (385 депутат) икки ҳафта ичида ҳужжат учун овоз бериши керак.

Худди шундай тартиб-қоидалар чаплар кўпчиликка эга бўлмаган Сенатда ҳам ўтказилиши керак. Сенат резолюцияни маъқулласа (232 овоз), ҳар икки палата қўшма мажлисда йиғилади ва қарор қабул қилиш учун 925 нафар парламентарийдан 617 нафари уни қўллаб-қувватлаши керак. Агар овоз бериш муваффақиятли якунланса, президент дарҳол лавозимидан четлаштирилади.