Фон дер Ляйен Орбанни Россия билан алоқалари ҳақида сўроқ қилишни режалаштирмоқда

Европа Комиссияси Президенти Урсула фон дер Ляйен Кипрда бўлиб ўтадиган норасмий Европа Иттифоқи саммитида истеъфодаги Венгрия Бош вазири Виктор Орбаннинг Россия билан алоқалари масаласини кўтармоқчи.

Бу ҳақда Венгриянинг Telex нашри хабар берди. Нашрнинг хабар беришича, бу Орбаннинг сўнгги саммити бўлади. Европа Кенгаши Президенти Антоину Кошта аллақачон ҳукумат ва давлат раҳбарларига геосиёсат ва Европа Иттифоқи бюджети муҳокама қилинадиган учрашувга таклифнома юборган.

Мақолада таъкидланишича, "саммитда яна бир мавзу - Венгрия ва Россия ҳукуматлари ўртасидаги музокаралар атрофидаги жанжал ҳам пайдо бўлиши мумкин". Нашр Европа Комиссияси вакили Паула Пиньонинг эълон қилинган маълумотлардан хавотир билдирганини эслатади.

Пиньо Урсула фон дер Ляйен бу масалани Европа Иттифоқи раҳбарлари олдида кўтармоқчи эканлигини айтди. Нашрнинг ёзишича, Европа Комиссияси фон дер Ляйеннинг "раҳбарият даражасида масалани давом эттириш" режасини тасдиқлаган. Европа Комиссияси Венгрия ҳукумати ўзини тушунтириши керак деб ҳисоблайди.

"Фавқулодда саммит исталган вақтда чақирилиши мумкин, аммо агар ҳамма нарса ҳозирги режаларга мувофиқ кеца, бу Орбаннинг истеъфога чиқишидан олдинги Европа Кенгашининг сўнгги йиғилиши бўлади. Шунинг учун, агар Урсула фон дер Ляйен Россия ва Венгрия ҳукуматлари ўртасидаги тил бириктиришни ҳозирги Венгрия Бош вазири ва бошқа раҳбарлар билан муҳокама қилса, саммитдан кўра мосроқ имконият бўлиши қийин", дейилади матнда.