Флик «Барселона»даги келажаги бўйича қарор қабул қилди

Ханс-Дитер Флик катта эҳтимол билан «Барселона»ни бошқаришда давом этади.

Catalunya Radio берган маълумотларга кўра, германиялик мутахассис ва Каталония клуби амалдаги шартномани 2027/28 йилги мавсум якунига қадар узайтириш бўйича оғзаки келишувга эришган. Мураббийнинг «кўк-анорранглилар» билан ҳозирги келишуви 2027 йилнинг 30 июнигача мўлжалланган.

Ханс-Дитер Флик 2024 йилнинг ёзида «Барселона» бошқарувини қўлга олган эди. Унинг қўл остида Каталония жамоаси икки бор Испания Суперкубогини, шунингдек, бир мартадан Испания Кубоги ва Ла Лига ғолиблигини қўлга киритди.

Ҳозирда «Барселона» 31 турдан кейин 79 очко жамғарган ҳолда Ла Лига турнир жадвалида пешқадамлик қилмоқда. «Кўк-анорранглилар» иккинчи ўринда бораётган «Реал»ни 9 очкога ортда қолдирмоқда.