Fitch агентлиги Украинанинг кредит рейтингини оширди

Fitch халқаро рейтинг агентлиги Украинанинг хорижий валютадаги узоқ муддатли эмитенти дефолт рейтингини «RD» даражасидан «CC» даражасига кўтарди. Шу билан бирга, агентликнинг пайшанба куни ўз сайтида эълон қилинган баёнотида қайд этилганидек, Fitch одатда «CCC+» ёки ундан пастроқ рейтингга эга суверен давлатлар учун прогнозларни белгиламайди, деб ёзади ТАСС.

Кредит рейтингининг кўтарилиши Украинанинг еврооблигациялари эгалари ташқи қарзни реструктуризация қилишга рози бўлгани билан боғлиқ. Агентлик таҳлилчиларининг фикрига кўра, бу «муаммо бўлган қарз алмашинувининг якунланганини ва чекланган дефолтни бартараф этишни англатади».

«Украинанинг евробондлари бўйича қарийб 6 миллиард долларлик асосий қарз ва фоизлар 24 ойга кечиктирилди, бу халқаро захираларнинг заифлашуви ва уруш харажатларига шошилинч зарурат шароитида ташқи қарзга хизмат кўрсатишни осонлаштирди. Қайта тузилишга облигациялар эгаларининг 75 фоизи (умумий асосий қарз миқдори бўйича) розилигини олди, бу минимал талаб қилинган 66,7 фоиздан юқори» — дейилади ҳужжатда.

Fitch таъкидлашича, ташқи қарзга хизмат кўрсатиш шартлари юмшатилганига қарамай, «CC» рейтинги Украина молия институтлари учун юқори юк билан боғлиқ давом этаётган хатарларни акс эттиради. Агентлик таҳлилчиларининг фикрича, мамлакатдаги жанговар ҳаракатлар 2023 йилгача давом этади, бунинг натижасида давлат қарзи ЯИМнинг 100 фоизидан ошади. Бу эса, ўз навбатида, инфратузилма ва ишлаб чиқаришни сақлаш учун харажатларни оширади, шунингдек, инфляция босимини оширади, шу билан бирга, «дефицитни бартараф этиш учун молиялаштириш манбалари ноаниқлигича қолмоқда».

20 июл куни Украина Вазирлар Маҳкамаси ташқи қарзларни тўлашни икки йилга кечиктириш бўйича қарор қабул қилди. Қарор кучга кириши учун Киев кредиторлар билан янги шартларни келишиб олиши керак эди. Буюк Британия, Германия, Канада, АҚШ, Франция, Японияни ўз ичига олган Украинанинг халқаро кредиторлар гуруҳи Киевнинг қарзга хизмат кўрсатишни 1 августдан 2023 йил охиригача кечиктириш ҳақидаги илтимосини қўллаб-қувватлади ва облигация эгаларига ушбу талабга рози бўлишни тавсия қилди.