Фицо яқин кунларда Зеленский билан учрашиши мумкин

Словакия бош вазири Роберт Фицонинг айтишича, унинг Украина ҳудуди орқали Россия газининг транзитини муҳокама қилиш учун Владимир Зеленский билан учрашуви яқин бир неча кун ичида бўлиб ўтиши мумкин.

"Биз бошқа учрашув санасини изламоқдамиз, у яқин кунлар ичида бўлиб ўтиши лозим," - дея Фицонинг сўзларини "Правда" портали келтирмоқда.

Илгари Фицо Зеленскийга Словакия ва Украина давлат чегараси яқинидаги Словакия ҳудудида учрашув ўтказишни таклиф этган эди. Унинг таъкидлашича, "учрашув Словакия ва бошқа мамлакатларга Украина ҳудуди орқали газ етказиб бериш масалаларини очиқчасига муҳокама қилиш учун қулай шароит яратади." Зеленский Словакия бош вазирининг таклифига жавобан унга 17 январь куни шахсан Киевга ташриф буюришни таклиф қилди. Кейинчалик Словакия парламенти раис ўринбосари Тибор Гашпар ТАССга Фитсонинг жума куни Киевга бормаслиги ҳақида маълум қилди.

1 январь куни Украина ҳукумати шартномани узайтиришни рад этганлиги сабабли, Украина ҳудуди орқали Россия газининг Европага транзити бутунлай тўхтатилди. Ушбу газни Словакия ҳам қабул қиларди. Кейинчалик Фитсо Украина делегациясининг иштирок этмаслиги туфайли Европа Иттифоқи мамлакатларининг 7 январга мўлжалланган газ бўйича маслаҳатлашуви барбод бўлганини маълум қилди. 9 январь куни Словакия бош вазири, агар газ транзити билан боғлиқ муаммолар ҳал этилмаса, Украинага нисбатан қатъий чоралар кўриш билан таҳдид қилди.