Фармацевтика маҳсулотлари бўйича давлат харидлари такомиллаштирилади

Ўзбекистонда фармацевтика соҳасида давлат харидларини амалга ошириш механизмлари янада такомиллаштирилмоқда. Бу Президент қарорига мувофиқ қабул қилинган Ҳукуматнинг 737-сонли (21.11.2025 й.) қарорида белгиланди.

Қарорга кўра, давлат хариди электрон тизими оператори платформасида “Farma.xarid.uz” модули яратилади. У орқали дори воситалари ва тиббий жиҳозлар бўйича барча давлат харидлари мажбурий тартибда амалга оширилади.

Янги тартиб ва талаблар

2026 йил 1 июлдан бошлаб давлат харидларида иштирок этиш ҳуқуқи фақат қуйидаги сертификатларга эга ишлаб чиқарувчилар ва дистрибьюторларга берилади:

• GMP сертификати – дори воситалари ишлаб чиқарувчилари учун;

• ISO 13485 сертификати – тиббий жиҳозлар ишлаб чиқарувчилари учун;

• GDP сертификати – дистрибьюторлик билан шуғулланувчи улгуржи ташкилотлар учун.

Модулдан фойдаланиш муддатлари

• 2026 йил 1 мартдан – Андижон ва Наманганда рўйхатдан ўтган давлат буюртмачилари Модул орқали харидларни амалга оширади.

• 2026 йил 1 июлдан – мамлакатдаги барча давлат буюртмачилари фармацевтика маҳсулотлари харидларини Модул орқали амалга оширишга мажбур бўлади.

Очиқланадиган маълумотлар

2026 йил 1 январдан “Pharma.gov.uz” порталида:

• давлат харидлари соҳасида қўлланиладиган товарларнинг миллий классификатори,

• фармацевтика маҳсулотларининг тўлиқ реестри,

• харид ҳажмлари

мунтазам равишда эълон қилиб борилади.